الشاعر ياسين الشيخ يكتب طالب هدنه

الشاعر ياسين الشيخ يكتب طالب هدنه

 

طالب_هدنه

خر الجبل واتهد

مش حمل جذب وشد

هلكت صد ورد

انا طالب الهدنه

إلى بنات أمنا حوا

إلى الساكنات

فى داخل قلبى من جوه

إلى الوقفات

طابور بالدور من بره

فاصل ونواصل

فى طول العمر

بقول الشعر وبناضل

وانا قلبى فيه شايل

من براكين وزلازل

وجاى رافع رايات وردى

بلون عمايلكو فى قلبى

بقول اهى نوه وتعدى

وتانى اعود

انا الواد اللى قلبه كبير

فحب الكل

ولا ينبئك زى خبير

اكيد ما يضل

انا لفيت بلاد الله

فحبيت بنت او

اكتر

فى كل مكان

اشوف كل البنات اميرات

اشوف عنيها الصبح

صورتها فى قلبى تبات

وانا أصلى كنت امير

فبعت الملك والسلطة

وحلمت بالتغيير

بقيت مملوك فى جيش

غازى

بحار فى بحر موجه

كان عالى

قلبى سفينه

ومشاعرى شراع

وهوايا سيرها

هاوى حكايات البنات

وسيرها

وعشمى القلب يتمللى

بهواكم

يا محلين بحلاوتكم

كاسات المر

فى حضرتكم

جميل العمر

وبكتب شعر

متزين

بتاء تأنيث

بياخد قلبى

م الوحشه

إلى التأنيس

انا التاريخ والمبتدأ فى العشق

ومن يومى بقول الحق

انا اللى كدبت حتى بصدق

وانا فى سنة خامسه

كتبت جواب لبنت عنيها

كانت خضرة

وانا فى اعدادى

كان الحبيبه

بياخدو عندى

كام حصة

انا التطوير والتجديد

ومراحل نمو الحب بالتحديد

انا الجوابات

والبلكونه والشبابيك

انا اللى عمل حكايات

عشان يلمحها

عمل تلاكيك

انا المحمول فى بدايته

انا وجودك

وتليفون بيتنا لما يرن

مترديش عشان

محدش غيرى

يسمع نغم صوتك

انا ما قبل عصر

الفيس والواتس

والله أيام

دلوقتى

كترت وسايل الاتصال

ولا بتسأل ولا بتحس

كانت ما بينا كتير مسافات

لكن بقلوبنا قربنا

حبينا حب يساع الارض والسموات

وحتى الكلمة ما قولنا

والله كانت حلوه دى الايام

كان الكلام بعنينا يتحكى

بعنينا نحضن بعض

وتطبطب بحنيه

احس الملك دان ليا

كان الواد اكيد راجل

وكانت البنت بنيه

والحب مش بالكلام

يا ناس الحب بالنيه

صعبان عليا الحب

وأيامه

والله كانت نعيم

كنا بنتسوى بنار هادية

عشان تضحك بنظرة

تكون للقلب نور هاديه

بعد الغياب

يشوفها القلب يرق

من نظرة

فطب وطاب

نظرة يا دى الايام

بالله يا تعودى

الله يجازى عاشقين زمان الفيس

الحب بينهم أسرع من قلوبهم

والله ده تهييس

بسرعة قبلت الأدد

يبقى ده مش حب عاد

والحكاية اكيد هتعك

يبقى النهاية اكيد

فى بلوك

المقارنة

والمفاضلة

والمعادلة

بين هوانا

وبين هواكم

باطلة

عرفتوا حل المسألة

يلزمها هدنه

نلم فيها م الوجع

بقايا روحنا

احنا جينا وللا روحنا

اكيد نعود م الحب

روحنا

بس الجميل فى المسألة

هو اننا

فضفضنا

بوحنا

بأمر الحب

وارتحنا

يا الحب يرجع

كيف ما كان

يا إما

هنفضل نحب فى ناس

تجرحنا

 

 

مقالات ذات صله