انا اسف … للشاعر أحمد طاحون

الشاعر احمد طاحون يكتب ..انا اسف 

لا انا اللي اختارت اكون انسان

ولا باختار زمان ومكان

وخايف اموت وانا خايف

انا اسف

زمان استاذي علمني اخاف منه

وابويا كان يخاف لو غيبت يوم عنه

وابني باخاف اشوفه حزين

قولوا لي منين اجيب له شجاعه تنفع للي من سني ومن سنه

انا اسف

وخايف ع اللي في الضلمه عنيه تتعب من الانوار

وخايف ع اللي عاش خايف ليقتل فار

وخايف م الوجع يكبر وخايف م الحنين يصغ

وخايف ابقى مش شايف ومش عارف طريق للقبر او للدار

انا اسف

جراحك يا اما على عيني ونفسي اجيب دوا ليكي

دموعك يا اما من عيني ودمعي بيجري في عنيكي

وانا العاجز كمان جايز اكون مرمي في كيس مقتول

وخايف اقول وحشتيني ونفسي ادفى باديكي

انا اسف

صحيح يا اما صحينا الصبح على حادثه عيال مقتوله ببشاعه

جسد اصغر من الفرحه لكن اعضاءه متباعه

عنيهم حتى متشاله انا اسف على الحاله

سفاله يا اما مش عارفين بان الظلم له ساعه

انا اسف

وزيره الصحه بتطبل وعايزه الناس يقولوا نشيد

هاتوا لنا الشاش وانا اتحزم واغني لكم وجانا العيد

معالي وزيره الصحه منين هنجيب لكم صحه

ومين يقدر يصارحها شبابنا عجوز ملان تجاعيد

انا اسف

حقيقي ياخلق انا اسف ومش عارف اقول غيرها

لا انا قادر اداريها ولا عارف ابررها

ولا خايف اقول خايف ولا خايف ابات مقتول

ومش معقول اعيش في قصور واموت مدفون في اسوارها

مقالات ذات صلة

التعليقات مغلقة الان